A resposta a alegación presentada por Vigo Industrial. 

Así pois, o Concello atendeu parcialmente algunhas das nosas demandas, e outras non. En concreto, o Informe de Alegacións di respecto á de Vigo Industrial:

Alegación nº: 1214 (...)

Unha vez analizado o exposto na alegación, procede indicar que en relación á catalogación remítese ao informe de carácter sectorial da administración autonómica competente en materia de Patrimonio. Aclarar que en atención a esta e outras alegacións reaxústase a redacción da ficha de catálogo.

En canto á cuestión urbanística, procede establecer un ámbito de ordenación unitario para a totalidade do conxunto.

Por último en canto aos terreos portuarios, reiterar a aplicación da Lei de Portos do Estado, remitíndonos aos informes sectoriais xa emitidos.

Por todo o indicador estímase que non procede acceder ao solicitado.

Sobre as nosas solicitudes compre aclarar:

A1.) Non se atende a nosa demanda de declarar o Conxunto Histórico, a pesar de que o complexo industrial-residencial-portuario da Alfageme de Bouzas concorda perfectamente coa definición desta categoría dada na Lei de Patrimonio Cultural de Galicia (art. 10).

A.2) Unicamente se establece nivel de protección Integral para o hórreo, quedando o resto de elementos desprotexidos ou cos niveis Estrutural ou Ambiental; co cal ábrese a porta ás fondas obras de "reestruturación", "ampliacións" e "substitucións" (LPCG art. 41) que requiren a nova edificabilidade concedida. Así, explicitamente, a ficha do Catálogo di sobre as naves de madeira que "ao non ter elementos significativos o relevantes concretos poderian ser reemplazadas por nova edificación que manteña similares caracteristicas de integración ambiental e mesmo tratamento dos materiáis existentes". 

B.1) Máis concretamente, respecto aos elementos que a nosa alegación pediu incluír explicitamente no Catálogo, quedan sen protección ningunha: o depósito de auga, o edificio de servizos, as vías empedradas, o sector oeste do xardín, as naves portuarias e o peirao. Tampouco se inclúen nos detalles da ficha do Catálogo valiosos elementos internos e accesorios do complexo da Alfageme que na nosa alegación se solicitou protexer explicitamente; coma, por exemplo, no caso do edificio principal, a "estrutura de piares e vigas metálicas, que sustentan o sobrado de madeira da primeira planta e forma o atrio cuberto sobre o obradoiro da planta baixa, os dous faiados nunha segunda altura e as estruturas, metálicas e de madeira, da cuberta; así como as varandas e escaleiras internas metálicas; os azulexos que cobren as paredes nas zonas de traballo e calquera outro elemento material de valor e significativo que se conserven dos diferentes espazos (oficinas, despachos, laboratorio, aseos, almacéns,...). Tamén deberán protexerse explicitamente nesta ficha a obra de carpintería de madeira das fiestras, e o letreiro BERNARDO ALFAGEME e o panel de azulexos co logo de MIAU". Semellante se podería dicir da vivenda dos donos, a nave anexa e as naves de madeira que tamén contan con elementos valiosos en carpintería de madeira, vidro e metal, así como algunha maquinaria.

Non obstante, si que se incluiron algúns dos elementos que na nosa alegación pedimos incluir como foron o sector leste do xardín, a caseta de control de accesos ("garita"), o hórreo e o cruceiro.

B.2) Os elementos da nave portuaria quedan desprotexidos e sen catalogar (ao igual que o resto de elementos do patrimonio cultural de Vigo en ámbito portuario, incluso os incluídos no Catálogo de Bens Culturais de Galicia). Isto faise a pesares de que o artigo 52 da Lei de Solo de Galicia obriga a incluír no PXOM a catalogación de todos os bens de interese cultural e natural do termo municipal e, loxicamente, a Lei de Portos do Estado non o impide (aínda que o así o afirme o Concello na contestación dada as nosas alegacións). De feito, cun marco normativo semellante, o PXOM de Vigo de 2008 si que catalogaba un bo número de edificios en ámbito portuario (como o Club Naútico, agora descatalogado); ou, máis recentemente, o Concello de Vilaboa si que puido catalogar e protexer o forno de cal de Punta de Travesada ou o Obradoiro do Atador do porto de San Adrán de Cobres.

C) Non se cualificou toda a parcela principal da Alfageme coma "unha única peza do Sistema Xeral de Equipamentos" como pedimos. De feito, o espazo adicado a Equipamento foise reducindo nas consecutivas fases da revisión do PXOM: no Borrador eran uns 8.400 m2, na Aprobación Inicial 8.026 m2 e finalmente na Aprobación Provisional 4.730 m2 (4.584 m2 de Eq. Xeral e 186 m2 de Eq. Local); aínda que en descargo, nesta última fase créanse dentro a Alfageme uns 3.682 m2 de Espazo Libre e Zonas Verdes (en partes do xardín e a vías empedradas)

D) Co obxectivo de posibilitar a conservación integral sen necesidade de outorgar nova edificabilidade e usos lucrativos, na alegación pediuse que a obtención polas mans públicas dos 14.382 m2 da parcela principal con destino a Equipamento Xeral fose pola vía da Expropiación ou Permuta Forzosa (tal e como permite o artigo 129 da LSG). Sen embargo na Aprobación Inicial mantívose a forma da Cesión ao Concello, agora elevada a unha porcentaxe do 25,6 % da edificabilidade lucrativa concedida máis 1,29 % da superficie do ámbito; isto é, o Concello obterá gratis uns solo de 4.838 m2 (4548 m2 de Equipamento Xeral, máis 182 m2 de Equipamento Local)

E e F) Como é lóxico e axustado a dereito, para lograr a conservación e reutilización integral dos conxunto da Alfageme, solicitamos a creación dun Plan Especial de Protección propio (art. 71 LSG), ou que se defecto se integrase no xa existente Plan Especial de Protección e Reforma Interior de Bouzas. Pero se seguiu apostando pola Plan Especial de Reforma Interior para permitir a nova edificabilidade lucrativa.

G) A parte portuaria non foi incluída no Catálogo da Aprobación Provisional, pero polo menos desta volta acabouse co disparate das dúas fichas separadas para os dous grupos de elementos da parcela principal da Alfageme que se daba na Aprobación Inicial.

H) Mellorouse sensiblemente a definición gráfica da ficha do Catálogo, incluíndo un plano detallado co diversos elementos protexidos e o seu nivel de protección. 

A descrición textual é aínda moi pobre, sobre todo tendo en conta o volume e valor dos elementos catalogados. Apenas faise febles alusións ás formas da estrutura pétrea do edificio principal, esquecendo por completo o resto da obra interior e exterior deste e os restantes edificios (non aparece referencia algunha a formigón, metal, madeira, vidro...). Non se citan dimensións algunhas e apenas se citan groseiramente as divisións e plantas do edificio principal, esquecendo estes aspectos presentes na vivenda dos donos e nave anexa.  

Tamén a descrición fotográfica é moi pobre, apenas unha foto, na que, para maior vergoña, o que se ve é un pequeno anaco da fachada norte do edificio principal encaixada entre as dúas naves portuarias que non se quixeron catalogar.

Pero a maior eiva (ao igual que no conxunto de fichas do catálogo) débese as escasísimas "determinacións para a súa conservación, rehabilitación, mellora ou recuperación" (art. 81 da LSG) que se fan. É máis, a única determinación aclaratoria que se fai é para permitir o "reemplazo" da parte das naves de madeira (denominadas erroneamente "naves do comedor"). ​​​